بڵاوکراوەتەوە لە: 23-05-2024

ڕاگری کۆلێجی یاسا و کارگێڕیی بەشداری کۆرسێکی ڕاهێنان دەکات لە وڵاتی چین

ئامادەکراوە لەلایەن:  زانکۆی هەڵەبجە

بەڕێز (د.ئاوارە حسێن ئەحمەد) ڕاگری کۆلێجی یاسا و کارگێڕیی زانکۆی هەڵەبجە وەک نوێنەری وەزارەتی خوێندنی باڵا و توێژینەوەی زانستیی و زانکۆی هەڵەبجە بەشداریکرد لە کۆرسێکی ڕاهێنان لە کۆماری گەلی چین.

کۆرسەکە لەلایەن کۆلێجی چینیی نێودەوڵەتیی بەیجین ڕێکخرابوو، لە چوارچێوەی پرۆگرامی (هاریکاریی چین بۆ داهاتوویەکی هاوبەش) لە ڕۆژانی (٨ بۆ ٢١ مایسی ٢٠٢٤) لە شاری بەیجینی پایتەختی کۆماری گەلی چین ئەنجامدرا، لە کۆرسەکەدا (٢٦) نوێنەری سێ کیشوەری ئاسیا، ئەفریکا و ئەوروپا، لە نۆ دەوڵەتی (عێڕاق-هەرێمی کوردستان، میسر، نایجیریا، کینیا، سیرالیۆن، بولگاریا، قوبرس، ئۆزبەکستان و یۆنان) بەشداربوون، نوێنەرەکانی سەر ئاستی عێراق- هەرێمی کوردستان، بریتی بوون لە بەڕێزان د.ئاوارە حسێن وەکو نوێنەری وەزارەتی خوێندنی باڵاو توێژینەوەی زانستیی و زانکۆی هەڵەبجە و دوو نوێنەری وەزارەتی پەروەردە.

لە کۆرسەکەدا ئەم بابەتانەی خوارەوە پێشكەشکران:
– تێگەیشتنێکی گشتیی دەربارەی دۆخی ناوخۆیی چین،
– گروپە ڕەگەزیی و ئاینییە سەرەکییەکانی چین (وەکو دوو گروپی پارێزراوی جینۆساید)،
– سیستەمی بەرگریی سەربازیی چین لە کۆندا،
– تاوانە نێودەوڵەتییەکانی دەوڵەتانی داگیرکەری خۆرئاوا دژ بە چین و وەرگرتنەوەی ئەو پارەیەی کە دەوڵەتانی خۆرئاوا لە داگیرکردنی چیندا خەرجیانکردووە لە داهاتی چین،
– تاوانی دوژمنکاریی ئیمپراتۆریەتی ژاپۆن دژ بە چین،
– جەنگی ناوخۆ و ڕزگاریی چین،
– یەکەم تاقیکردنەوەی چەکی ئەتۆمی چین لە ڕوانگەی یاسای نێودەوڵەتیدا،
– پرسی بە ئەندام نەبوونی چین لە دادگای تاوانکاری نێودەوڵەتی،
– کەلتوری هونەریی جەنگی چینی،
– کەلتوری شاری بەیجین،
– پەیوەندی نێوان کەلتورەکان

لە چوارچێوەی کۆرسەکەدا بەڕێز د.ئاوارە حسێن وانەیەکی لەسەر تاوانە نێودەوڵەتییە بەردەوامەکانی دژ بە کورد و بەتایبەتی جینۆسایدی هەڵەبجە پێشکەشکرد.
هەر لە چوارچێوەی کۆرسەکەدا و بە مەبەستی لە نزیکەوە ئاشنابوون بە ڕیشەکێشکردنی هەژاریی، بوژانەوەی ژیانی گوندنشینەکان، کشتوکاڵ، پیشەسازیی، کەلتور، هونەر، میرات و پاراستنی کەلتوریی گوندنشین، فێربوونی ئەزموون و پراکتیکی هەماهەنگی گەشەپێدانی شارستانیەتی ماددی و شارستانیەتی ڕۆحی چین، تێگەیشتن لە مێژووی گەشەسەندنی کەلتووری پیشەسازیی چین، بەشداربووان سەردانی هەریەک لە (گوندی ئانجی، کێڵگەکانی چای سەوز، چای سپی، چای ڕەش، هونەری پەیکەرسازیی، هونەری دروستکردنی سیرامیک و کاری هەڵکۆڵین، مۆزەخانەی دیارییەکانی پەیوەندیی دۆستایەتی و دیواری گەورەی چین)یان کرد.
لە کۆتا ڕۆژی کۆرسەکەدا دوو بڕوانامە بە بەشداربووان بەخشرا.

chevron-down