زانکۆی هەڵەبجەو ڕێکخراوی ڕۆشنبیری جەمال نەبەز، کۆنفرانسی کوردو کوردستان لە بەڵگەنامە بیانیەکان ئەنجام دەدەن
ڕۆژی ١٠-٦-٢٠٢٣، سەرۆکی زانکۆی هەڵەبجە بەڕێز (پرۆفیسۆر د.مهاباد کامل عبداللە)و بەڕێوەبەری سەنتەری توێژینەوەی زانستی زانکۆ بەڕێز(د.هێرش حمەامین فقێ) لەگەڵ بەڕێز (م.دەوەن معروف) بەڕێوەبەری ڕێکخراوی ڕۆشنبیری جمال نەبەز و ستافی کارگێڕی ڕێکخراو لە مۆزەخانەی جمال نەبەز لەشاری سلێمانی کۆبوونەوە.
کۆبونەوە تایبەت بە ڕێکخستنی یەکەمین  کۆنفرانسی زانستی سەنتەری توێژینەوەی زانستی زانکۆی هەڵەبجە بە هەماهەنگی و سپۆنسەری ڕێکخراوی ناوبراو لە کۆتایی مانگی ۱۰ی ئەمساڵ بڕیارە ئەنجام بدرێت بە ناونیشانی “کورد وکوردستان لە سەرچاوەو بەڵگەنامە بیانیەکاندا”.

بەڕێز پرۆفیسۆر دكتۆر مەهاباد كامیل عەبدوڵڵا سەرۆکی زانکۆی هەڵەبجە، بڕوانامەی نێودەوڵەتی بەخشییە خوێندکارانی سەرکەوتووی بەشی ئەندازیاری شارستانی، كە بەشداربوون لە خولێكی نێودەوڵەتی.

پاش ئەوەی سەرۆكی زانكۆی هەڵەبجە لە ڕێگەی بەڕێز پرۆفیسۆری یاریدەدەر ئاراز جەمال ئاغا، تەلارساز، مامۆستا و توێژەر لە زانکۆی کۆڤێنتری لە وڵاتی بەریتانیا، توانیان کۆرسێکی (BREEAM Accredited Graduate) وەرگرێت بۆ خوێندکارانی بەشی ئەندازیاری شارستانی زانکۆی هەڵەبجە و بەشێك لە خوێندکارانی بەشی ناوبراو بەشدارییان کرد لە تاقیکردنەوەیەکی نێودەوڵەتی و نووسینی وتارێکی زانستی، ١٤ خوێندکار بە سەرکەوتوویی خولەکایان تەواو کرد و بوونە خاوەنی بڕوانامەی نێودەوڵەتی (BRE Academy) لەبواری (Sustainability) کە خۆی ئەبینێتەوە لە دیزاین کردن و دروست کردنی بیناکان بەشێوەیەك کە بەپێی (2030 UN SDGs) (United Nations Sustainable Development Goals 2030) بڕی دوانۆکسیدی بەکارهاتوو لە ئەنجامی وزەی ناو بیناکانەوە بەڕێژەی (50%) کەم ببێتەوە و لە داهاتووشدا (2050) نزیك ببێتەوە لە (0%)، کە ئەمەش ئەبێتە هۆی دروست کردنی بینایەك کە هاوڕێی ژینگە بێت (Green Building).

لە هەمان کاتیشدا خوێندکارانی سەرکەوتوو بۆ ماوەی ٥ ساڵ ناویان ئەچێتە سەر (Green Book Life) وەك شارەزا لە بوارەکەیا، هەروەها لۆگۆی BRE وەرگرن.
لەدوای بەخشینی بڕوانامەكان بە خوێندكاران بەڕێز سەرۆکی زانکۆ لای خۆیەوە پیرۆزبایی کرد لە خوێندکارانی سەرکەوتوو و پێی راگەیاندن، کە وەك زانکۆی هەڵەبجە هەموو هەوڵێك ئەدەن بۆ بە نێودەوڵەتیکردنی زانکۆ.

بەچاودێری سەرۆکی زانکۆی هەڵەبجە بەڕێز (پ.د.مهاباد کامل عەبدوڵا)و بەسەرپەرشتی ڕاگری کۆلێجی پەروەردەی جەستەیی و زانستە وەرزشیەکان بەڕێز (د.ئاکۆ ئیبراهیم فقێ) ڤێستیڤاڵی یاریەکوردەواریەکان ئەنجامدرا.
ڤێستیڤاڵەکە دوای نیوەڕۆی ئەمڕۆ ٤-٦-٢٠٢٣، لەیاریگای کۆلێجی پەروەردەی جەستەیی و زانستە وەرزشیەکان دەستیپێکرد و چەندین یاری کوردەواری و جیاواز پێشکەشکران، سەبارەت بەڤێستیڤاڵەکە ڕاگری کۆلێجی پەروەردەی جەستەیی و زانستە وەرزشیەکان ڕایگەیاند: ئەمڕۆ دوو ڤێستیڤاڵمان ئەنجامداوە، ڤێستیڤاڵی یەکەم، ڤێستیڤاڵی یاریە کوردەواریەکان بوو کەئامانج لێی مامەڵەکردنی زانکۆیە لەگەڵ کۆمەڵگەو گەڕانەوەی کۆمەڵگەیە بۆ ناو زانکۆو بەپێچەوانەشەوە، هەروەک مەبەستمان زیندووکردنەوەی یاریە کوردەواریەکان و دووبارە ئاشناکردنەوەی بوو بە منداڵان تابزانن هەم چێژبەخش و هاوکات بەسوودیشن، د.ئاکۆ وتیشی: مەبەستمانە شوناسی کوردەواری یاریەکان بپارێزین و زیاتر برەوی پێبدەین.
ڕوونیشیکردەوە ڤێستیڤاڵی دووەم تایبەت بو بەیاری منداڵان بەتایبەت کەلەئێستادا مۆبایلی زیرەک و ئایپاد و تۆڕەکۆمەڵایەتیەکان و تەکنەلۆجیا تەواوی کۆمەڵگەو ماڵەکانی تەنیوەو بەکارهێنانی لەلایەن منداڵانەوەو زیانە تەندرووستیەکانی بوە بەهۆی درووستکردنی کاریگەری خراپ لەسەر ڕەفتاری منداڵان سەرەڕای خراپی لایەنە تەدرووستیەکانی بۆ منداڵان وەک کەمی جوڵەو درووستبونی قەڵەوی، بۆیە لەڕێگەی ئەم ڤێستیڤاڵەوە ئەو پەیامەمان بەدایکان و باوکان گەیاند کەدەکرێت لەماڵەکاندا کۆمەڵێک یاری ئاسان و هەرزان هەبێت کەهەم چێژبەخش هەم سوودی هەبێت و جوڵەی پێویستیش بۆ منداڵ دەستەبەربکات

سەرلەبەیانی ئەمڕۆ ٤-٦-٢٠٢٣، سەرۆکی زانکۆی هەڵەبجە، بەڕێز (پ.د.مهاباد کامل عەبدوڵا) بەئامادەبونی یاریدەدەری سەرۆکی زانکۆ بۆکاروباری کارگێڕی و دارایی بەڕێز (پ.ی.د.سیروان حامد)و ڕاگری کۆلێجی پەروەردەی بنەڕەت بەڕێز (پ.ی.د.ڕێبوار زین الدین)و سەرۆکی بەشی جوگرافیا بەڕێز (م.ئاریان علی حامد) پێشوازیکرد لەسەرۆکی زانکۆی جیهان بەڕێز (پ.د.ئومێد ڕەفیق)و یاریدەدەری سەرۆکی زانکۆی جیهان بۆکاروباری خوێندکاران بەڕێز(پ.د.بەمۆ پەروێز)، سەرۆکی هەردوو زانکۆ گفتوگۆیانکرد لەسەر ئەنجامدانی چالاکی ئەکادیمی هاوبەش و زیاتر برەودان بەپەیوەندی زانستی نێوان هەردوو زانکۆ.
هاوکات پێشوازیکر لەنوسەران (عەزیز ڕەئوف، موئمین زەڵمی)و گفتوگۆیان لەسەر چەندین تەوەری پەیوەست بەبواری ڕۆشنبیری و چالاکی زانستیکرد.

مامۆستایان (هیوا احمد رحیم، دەشنێ انور) لە کۆلێجی پەروەردەی جەستەیی و زانستە وەرزشییەکانی زانکۆی هەڵەبجە توێژینەوەیەکی هاوبەشیان بە ناونیشانی((Health-related factors of the Iraqi adult population during the 2020 COVID-19 pandemic: physical activity, eating behavior, quality of life, general health, and mood states cross-talk))   لە گۆڤاری BMC Public Health  بڵاوکردەوە.

ئەم توێژینەوەیە لە گۆڤارى “BMC Public Health”  بە ئیمپاکت فاکتەرى (4,135) بڵاوکرایەوە، کە لە چارەکی یەکەم Q1 لە Scimago   تۆمار کراوە. بۆ بینینی تەواوی توێژینەوەکە کلیک لێرە بکەن

        ئامانجى توێژینەوەکە بریتیە لە: لێکۆڵینەوە و شیکردنەوەى کاریگەرییەکانى (کەرەنتەینەکردن) لەسەر چالاکیى جەستەیی، ڕەفتارەکانى خوران، چۆنیەتى ژیان، تەندروستى گشتى و دۆخى دەرونى هاوڵاتیانى عێراقى- پارێزگاى هەڵەبجە لە کاتی کۆڤید-19دا.

دەرئەنجامى توێژینەوەکە ڕوونیدەکاتەوە  دانیشتوانی (پارێزگاى هەڵەبجە) لە کاتی کۆڤید-19دا، ئاستی چالاکیی جەستەیی، تەندروستی گشتی، کوالیتی ژیان و دۆخى دەروونی نزمیان هەبووە، کە هۆکارى ئەمەش دەگەڕێتەوە بۆ ئەو سەردەمەى، هاوڵاتییان بۆ ماوەیەکى زۆر لە کەرەنتینەدا بوون. هەروەها لەسەر بنەماى دەرئەنجامەکانى ئەم توێژینەوەیە پێشنیاز دەکرێت چالاکیی جەستەیی وەک هۆکارێکی بەنرخی باشکردنی تەندروستی لە کاتی پەتای کۆڤید- 19 دا، لەبەر چاو بگیردرێت. ئەمەش بەهۆى ئەو پەیوەندییە بەرچاوەى کە لە نێوان ئاستی نزمیی چالاکیی جەستەیی تەندروستی گشتی، باری دەرونیدا هەبووە لە کاتى کەرەنتەینەکردندا.

بۆ بینین و زانیارى زیاتر لەسەر توێژینەوەکە  لێرە کلیک بکەن

زانکۆی خرۆنینگن هەڵدەستێت بە سازدانی دوازدەهەمین کۆنفرانسی نێودەوڵەتی ساڵانەی خۆی لە ژێر ناونیشانی (Partners in Digital Mobilization) لەسەر بابەتی (Partners in Digital Mobilization) لە بەرواری ١٧ تا ١٩ی ١٠ی ٢٠٢٣ لە (زانکۆی ئەردەن بۆ زانست و تەکەلۆژیا) لە وڵاتی ئەردەنK کە نوێنەرانی ١٠٠ ڕێکخراو و دامەزراوە بەشداربن تیایدا.

تێبینى/ دوا کات بۆ خۆتۆمارکردن ٢٠ى حوزیران ٢٠٢٣ دەبێت.
بۆ زانیارى زیاتر دەربارەى کۆنفرانسەکە:
لێرە کلیک بکەن

بۆ خۆتۆمارکردن بۆ مەبەستى بەشداریکردن لە کۆنفرانسى ناوبراو  :
لێرە کلیک بکەن

لە درێژەی کار و چالاکییەکانی ئۆفیسی ڕیزبەندییە نیشتیمانییەکان سەبارەت بە ناساندن و تۆمارکردنی زانکۆی هەڵەبجە لە پلاتفۆڕمە نێودەوڵەتیەکانداو پەیوەندیکردن بە دەزگای سکۆپەسەوە (Scopus) وەک دەزگایەکی فەرمی سەر بە پەبلیشەری بەناوبانگی(Elsevier) و ناردنی سەرجەم زانیاریە پێویستەکان لەسەر زانکۆی هەڵەبجە، لە ئێستادا بە ناو و ئایدی تایبەتی خۆی لە سكۆپەس تۆمارکراوە.
پێشڕەو احمد ، مامۆستا لە کۆلێجی زانست کەسەرپەرشتی ئەم هەوڵەی کردووە، بە وێب سایتی زانکۆی ڕاگەیاند: ئەم تۆمارکردنەی زانکۆی هەڵەبجە لە Scopus دەبێتە دەروازەیەک بۆ تۆمارکردنی ناوی سەرجەم توێژەران و ئەو توێژینەوانەی کە بە ناوی زانکۆوە لە سکۆپەس بڵاودەکرێنەوە، لە هەمانکاتدا کار ئاسانی زۆر باش ئەکات بۆ ئەوەی زانکۆ لە ساڵانی ئایندەدا بتوانێت بەشدار بێت لە سیستمی رانکینگە نێودەوڵەتییەکان وەک Scimago و QS Ranking کە ئەو دوو دەزگایە پشت بە داتاکانی سکۆپەس ئەبەستن.
زانکۆی هەڵەبجەو قۆناغێکی نوێ
لەپاش تۆمارکردنی زانکۆی هەڵەبجە لە Scopus بە بەناو ئایدی تایبەتی خۆی، لە ئێستادا سەرجەم توێژینەوەکانی زانکۆی هەلەبجە لەناو پرؤفایلی زانکۆکەدا لە سکۆپەس کۆکراوەتەوە کەژمارەیان ٢١٧ توێژینەوەیە، بە ٦٥ توێژەر.
لە نوێترین هەوڵدا بۆ تۆمارکردنی زانکۆکە لە دامەزراوەی QS Ranking،  لە پاش ناردنی سەرجەم زانیارییە پێویستەکان بۆ ئەو دامەزراوەیە، ڕەزامەندی خۆیان دەربڕی بۆ تۆماردنی زانکۆمان و لەم لینکەی خوارە دەتوانن پڕۆفایلی زانکۆی هەڵەبجە ببینن لە QS Ranking.
لێرە کلیک بکەن بۆ بینینی پرۆفایلی زانکۆی هەڵەبجە

پیرۆزبایی لە تەواوی مامۆستایان و ستافی زانکۆدەکەین، بە هیوای ئەنجامدانی کاری باشتر و گرنگتر بۆ زانکۆمان.

بەمەبەستی ئاگاداربوون لە ئیش وکارو هەنگاوەکانی کۆکردنەوەی زانیاری تایبەت بە ئینسایکلۆپیدیای پارێزگای هەڵەبجە، سەرۆی زانکۆی هەڵەبجە بەڕێز (پ.د.مهاباد کامل عبدللە) لەگەڵ سەرۆکی لیژنەی باڵای ئینسایکلۆپیدیا بەڕێز (پ.ی.د.حسین محمد)و ئەندامەکانی کۆبویەوەو گفتوگۆیانکرد لەسەرهەنگاوەکانی ئامادەکاری ئینسایکلۆپیدیاو هەماهەنگیکردنی زیاتر لەگەڵ کەسانی شارەزاو لایەنەپەیوەندیدارەکان.
کۆبونەوەکە سەرلەبەیانی ئەمڕۆ ٢٥-٥-٢٠٢٣ لەسەرۆکایەتی زانکۆی هەڵەبجە بەڕێوەچو، لەدەستپێکدا سەرۆکی زانکۆ دەستخۆشی لەلیژنەی باڵای ئامادەکارکرد بۆ ئەو کارانەی ئەنجامیانداوەو پێیڕاگەیاندن (ئینسایکلۆپیدیای پارێزگای هەڵەبجە) هەنگاوێکی زۆر گەورەو گرنگ و مێژوویەو هەموان شانازی پێوەدەکەن و پێویستە بەووردی کاری تێدابکرێت و هیچ کەمتەرخەمیەکی تێدانەکرێت. دواتر سەرۆکی لیژنەی ئینسایکلۆپیدیا (پ.ی.د.حسین محمد صاڵح) هەنگاوەکانی پڕۆژەکەی خستەڕوو کە توانیویانە زانیاریەکان بەوپەڕی ئاماناتەوە وەربگرن و کاری تێدابکەن، پاشان گفتوگۆکرا لەسەر ئەنجامدانی چەندپێشنیارێک بۆ زیاتر دەوڵەمەندکردنی ئینسایکلۆپیدیای هەڵەبجە.
ئیسناسیکلۆپیدیای پارێزگای هەڵەبجە، پڕۆژەیەکی هاوبەشی نێوان( زانکۆی هەڵەبجەو ڕێکخراوی خاڵ بۆ هزرو ڕۆشنبیری)یە، لەلایەن کەسایەتی(شێخ علی شێخ عیزەدین) تێچونەکەی لەئەستۆ گیراوە، پڕۆژەکە ڕۆژی ٧-٨-٢٠٢٢، بەئامادەبوونی پارێزگاری هەڵەبجەو ژمارەیەک لەبەڕێوەبەرو بەرپرسی حکومی و حزبی و ڕۆشنبیران لەمەڕاسیمێکدا لەکتێبخانەی ناوەندی زانکۆی هەڵەبجە ڕاگەیەنرا.

مەراسیمی بەخشینی بڕوانامەی پێداگۆجی بە بەشداربووانی خولی دووەمی پێداگۆجی لە زانکۆی هەڵەبجە بەرێوە چوو، سەرۆكی زانكۆش بەڵێنیدا، بەردەوام دەبن لە كردنەوەی خولی نوێ‌ بۆ فێرخوازان.

رۆژی پێنج شەممە ٢٥/٥/٢٠٢٣ لە هۆڵی کتێبخانەی ناوەندی زانکۆی هەڵەبجە مەراسیمی کۆتایی هاتنی خولی دووەمی پێداگۆجی بەریوە چوو، كە مەراسیمەكە لەلایەن سەنتەری زمان و پێداگۆجییەوە رێكخرابوو.

لە سەرەتای مەراسیمەکەدا بەرێز پرۆفیسۆر د. مەهاباد کامل عەبدوڵڵا سەرۆکی زانکۆ باسی بەرەوپێشچوونی زانکۆ و گرنگی چالاکییەکانی سەنتەری زمان و پێداگۆجی کرد، ئاماژەی بەئاڵنگارییەکانی بەردەم کردنەوەی سەنتەری پێداگۆجی لە زانکۆش کرد و جەختیكردەوە، سەرەڕای ئەوانە توانیویانە ئەو هەنگاوە بنێن.

سەرۆكی زانكۆی هەڵەبجە لە وتارەكەی سەرەڕای پیرۆزبایی لەفێرخوازانی ئەم خولە، بەڵێنیشدا بەردەوام دەبن لە كردنەوەی خولی نوێی پێداگۆجی بۆ فێرخوازان، بۆ ئەوەی زۆرترین كەسی ناوچەكەو تەنانەت دەرەوەی ناچەكەش سوودمەندبن.

پاشان پرۆفیسۆری یاریدەدەر د. سەرکێو سەلاح سەرپەرشتیاری سەنتەری زمان و پێداگۆجی باسی لە گرنگی پێداگۆجی و رێگە مۆدێرنەکانی وانەوتنەوە کردو جەختیكردەوە، دەیانەوێت لەو رێگەیەوە كەسانی ئەكادیمی باش پێبگەیەنن.

لە بەشێکی دیکەی مەراسیمەکەدا مامۆستا باوەڕ محەمەد بەرێوەبەری خولی پێداگۆجی وردەکارییەکانی خولەکەی بە ژمارە خستەڕوو، باسی لە بابەت و تەوەرەکانی نێو خولی پێداگۆجیش کردو ئاماژەی بەوەدا کەمتر لە ساڵ و نێوێکدا سەنتەری زمان و پێداگۆجی سێ خولی پێداگۆجی کردووەتەوەو بەردەوامیش دەبێت لە كردنەوەی خولی نوێ‌ بۆ فێرخوازان.

لە بەشێكی تری مەراسیمەكەدا بروانامەی پێداگۆجی لە لایەن سەرۆكی زانكۆی هەڵەبجەو یاریدەدەران و بەشێك لە راگرانی كۆلیژەكان بڕوانامەی پێداگۆجی بەخشرایە بەشداربووان.

سەنتەری زمان و پێداگۆجی لە سالی ٢٠١٧ بە ناوی سەنتەری زمان دروستکراوە پاشان لە ٢٠١٩ چالاککراوەتەوە، لە ساڵی ٢٠٢١ ناوی سەنتەرەکە کراوە بە سەنتەری زمان و پێداگۆجی، تا ئێستا دوو خولی دەرچوانی پێداگۆجی هەیە و خولی سێیەم لە نیوەی کارەکانیدایە و بەم نزیكانە ئەوانیش كۆتایی بە خولەكەیان دەهێنن.

زانکۆی هەڵەبجە ودامەزراوەی سەرۆک جەلال تاڵەبانی یاداشتنامەیەكی لێکتێگەیشتنیان واژووكرد، كە چەند بوارێكی جیاواز بۆ پێشخستنی زانكۆ لەخۆ دەگرێت.

رۆژی سی َشەممە ٢٣-٥-٢٠٢٣ واژوو لەسەر لێکتێگەیشتنی نێوان زانکۆی هەڵەبجە و دامەزراوەی سەرۆک جەلال تاڵەبانی کرا، ئەوەش لەلایەه هەریەكە لە بەرێزان سەرۆکی زانکۆی هەڵەبجە (پ. د. مەهاباد کامیل عەبدوڵڵا)، سەرۆکی دامەزراوەی سەرۆک مام جەلال (د. محەمەد سابیر).

مەراسیمی واژووكردنی لێكتێگەیشتنەكە بەئامادەبوونی یاریدەدەرانی سەرۆکی زانکۆو بەڕێوەبەری پەیوەندییەئەکادیمییەکان و لێپرسراوی سەنتەری کاری زانکۆی هەڵەبجە دامەزرێنەرو لێپرسراوی کارگێڕی و پەیوەندییەکانی دامەزراوەی سەرۆک جەلال تاڵەبانی بەرێوەچوو.

دوای واژووكردنی لێكتێگەیشتنەكەش، لەکۆنگرەیەکی ڕۆژنامەنوسیشدا سەرۆکی زانکۆی هەڵەبجە ڕایگەیاند، واژووكردنی لێكتێگەیشتنێك لەگەڵ دامەزراوەی سەرۆک جەلال تاڵەبانی ڕۆژێکی مێژووییە، چونكە هەموومان قەرزاری سەرۆک مام جەلال-ین، ئەو ڕۆڵێكی گەورە و کاریگەری هەبووە لەدامەزراندنی زانکۆکان و گەشەپێدانیان، بۆیە ئێمەش بەشانازییەوە هەوڵی بەرەوپێشبردن و گەشەدان بەو هەنگاوانە دەدەین.

سەرۆكی زانكۆی هەڵەبجە راشیگەیاند، ئێستا بەخۆشحاڵییەوە لەگەڵ دامەزراوەی سەرۆک جەلال تاڵەبانی واژووی لێكتێگەیشتنێكمان كردووە، بۆ ئەوەی خزمەتی خوێندکاران و فەرمانبەرو مامۆستایانی پێبکەین لەبواری زانستی و توێژینەوە و بوارەكانی تریشدا.

پاشان سەرۆکی دامەزراوەی سەرۆک جەلال تاڵەبانی باسی لەڕۆڵی (سەرۆک مام جەلال) لە بوارە جیاوازەکانی کۆمەڵگە کرد و وتی: خۆم بە خوێندکارێکی مام دەزانم و هیوادارین بتوانین کارێک ئەنجامبدەین لەئاستی گەورەیی ئەو زاتەدا بێت،

هەروەها باسی لە ڕۆڵی مام لەدامەزراندنی زانكۆكان و پشتگیرییەكانی كردو وتیشی: پێویستە هەڵەبجە گرنکی زیاتری پێبدرێت و ئێمەش هەرچەند بتوانین هاوکاردەبین، پاشان باسی لەکارەکانی دامەزراوەی سەرۆک مام جەلال و پڕۆژەکانی داهاتووی دامەزراوەكەیان بەتایبەت لەبواری خوێندنی باڵاو دروستکردنی پەیوەندی لەگەڵ زانکۆ پێشکەوتووەکانی ناوخۆ و عێراق و جیهانیش كرد.